Sebis Site

Dr Sebi het e Wuche Ferie ! U was macht me do am beschte ?

______________________________________

Riiichtig,

ME VERSCHWINDET !
Und zwar iz Tessin.

Widereinisch hani z Glück gha di fantastischi Feriewohnig vo Schützes dörfe z bruche.

Diräkt oberhaub vom chline Dörfli Brissago ligt si wunderbar im Hang, u bietet e Wäutklasse Usblick ufe Lago Maggiore.

Jede morge heimer uf dr Terasse zmörgelet, was jo miz im Oktober nid ganz eso normau isch...

Mir hei verschiedenschti Usflüg gmacht vo Luino uf Lugano über Melide nach Locarno, Ascona, Maggia-,Verzasca-Tal, Cantovalli etc...

__________________________________

Wunderschöni Landschaft im MaggiaTau;

Im hingerste Dörfli vom Maggiatau simer z Fusio gones Plätteli Freesä.Eifach wiemersech es Plätteli im Tessin vorschteut, mitemne feyne Glesli Merlot.Was bruchts de eigentlech me zum glücklech z si ?

______________________________________

Am Donnschtig Obe simer iz ,,Neu,, eröffnete Seven vom Ivo Adam go Znacht DEGUSTIERE. Das het si Grund das ig schribe degustiere. Dr Ivo het nämlech uf sire Charte über 60 (!) Gricht (Taster) zur Uswau. Sprich me steutsech am beste es 5-6 Gang menü zäme wo eigentlech nume us Vorspise besteit. Das het durchus sini Vorteile, 1. Me Überisstsech nid 2. Me Isst u gniesst automatisch langsamer 3. Me cha schöneri nid überfüllti Täller bewunder 4. Etc... Eigentlech hets fasch nume Vorteile füre Gast. Mir si am 21.00h cho und am 24.00 wider gange und z ganze Menü heimer uf dr Terasse (!) gässe, und das nid ganz elei. Z ganze Seven isch komplett vou gsi ! Sprich dr Ivo schint Erfolg z ha mit sim ,,Neue,, Konzept. Congratulations ! D Lounge diräkt am See bietetsech herlech fürnes Apero a !

Um e Idruck z übercho muesch mou d Karte studiere, oder am beste säuber verbi go luege ! E Reservation isch momentan unerlässlech !
__________________________________

Dr Oli und Ig si uf Melide iz Dellago go Znachtässe u da mir dört e chlei

beziehige hei het üs dr Cheff es haubs Dessertbüffet zum abrunde vom Menü zouberet !

Supper sach gsi;

Nach däm mir z Fusio hei es Plätteli ufere Skala vo 0-10 mitemne 9ni hei bewärtet heimer uf dr Heimreis dänkt, jetz wöimer mou luege was dr Nachbar Kanton VS so druffe het.
________________________________

Nachere Kurveriche fahrt dür z Centovalli heimer üs es witers Plätteli gönnt. Es het du aber mit abstang nid a das us Fusio möge.... sägemer es 4i. U das mit abgloffnigem Butter emene Ischaute Dôle und chlei mudrigem Ufschnitt ! Z Valliser Brot het dr Schnitt möge ufrunde und di nätti Bedienig het no dr räscht dr zue bitreit ;-)

____________________________________

Abschliessend chame säge das z Tessin Kulinarisch, Landschaftlech und Gastfründschaftlech ir ganze Schweiz am meischte z biete het !!! Es isch eifach z beachte das de NID (!) Ir Houptsaison Juni,Juli,Auguscht geisch sondern genau vor oder nächär !